1. Tekst

  2. Gotar

  3. Mihemed Ronahî
  4. HESABGER- Ferhadê Mihemed
HESABGER- Ferhadê Mihemed,hesabger,ferhadê,mihemed

HESABGER- Ferhadê Mihemed

A+ A-

 

Mihemed RONAHΠ

Ferhadê Mihemed demek dirêj wek şopgerekî edebiyata Kurdî di nav wêjeyê de xuya dibû jixwe. Ango wek xwendekarekî û wek hezkerekî wêjeya Kurdî li vê derdorê bû jixwe. Lê axir vaye kitêba xwe ya ewil jî derxistiye bi xêr û xweşî. Hêvîdar im ev berhema bibe arava gelek berhemên wî yên din yên serkeftîtir. Ez dixwazim behsa pirtûka wî bikim bi çend xalan.

 

 

1- Di warê bikaranîna zimên de meriv bi hêsanî dikare bêje ku Ferhad ne xirab e û Kurmanciyeke wî ya têra xwe tijî heye. Wek mînak dema nivîsiye jî meriv dibêje qey diaxive li hember meriv. Di warê rastnivîsê de jî berhema ne xirab e. Redaktor Tehsin Baravî ye ez bawer im ev yek piçek ji hessasbûn û şarezatiya wî ye jî. 

 

 

2- Ji ber ku berhema nivîskêr ya ewil e ez dikarim bêjim ku di warê hûnandin û tevnsaziyê de hinek xeşîmiya nivîskêr heye. Lewre hûnandina çîrokan û di çîrokan de derbasbûna nav mijaran piçek bilez û nişkavî bûye.

 

 

3- Çîroknûsî ji zehmettirîn cûreyên nivîsê yek e. Ya ji wê jî zehmettir helbestvanî ye. Ji ber ku di herdu cûreyan de jî divê peyv û hevokên herî kurt werin bikaranîn. Divê hûn mexsed û mirazên xwe bi peyvên herî kêm vebêjin. Di romannûsiyê de ne wisa ye. Hûn dikarin mijarê heya ji we tê dirêj bikin û xwendekêr li hok û keviyên vebêjiyê bigerînin lê van herdu cûreyana ne wisa ne. Divê hûn bi kurtbêjî li xwendekêr bixin û bi tevizînin. 

 

 

4- Meseleya tevizandinê ne henek e bi ya min heke helbestek an çîrokek piştî çend hevokan di xwendekêr de tevînekê çêneke ev tê wê wateyê ku ne qelew e.

 

 

5- Çîrok ne mecbûr e fîktîf be, dikare bûyereke rojane be jî lê divê cudatiyekê nîşan bide û ferqekê ji jiyana rojane derxe holê. Ango di serê xwendekêr de matmayînekê bihêle. Jixwe çîroka çîrokê matmayîhiştin e. Di vî warî de nivîskarê me piçek sist maye. 

 

 

6- Cihê şanazî û serbilindiyê ye ku di vê dewra xirab ya ku xort û qîzên me berî dane zimanê tirkî û şildim bildima wan e de xortekî wek Ferhadê Mihemed bi kurmanciya xwe ya beza reqandiye wêjeyê. Bila sihheta wî xweş be û dest û hest û dil û pênûsa wî ter be. Berhema ewil bi ya min divê zêde jî neyê rexnekirin ji ber wê yekê jî ez kurt bibirrim çêtir e lê dikarim bi hêsanî bêjim vî xorta di pêşerojê de dê berhemên gelekî serkeftîtir ji me re birêse.


Gotinên miftehî :